黃金看俏

陸羽仁 BLOG 2016年5月23日  

網誌分類: 經濟 
美國4月CPI增長0.4%，略高於預期，較去年同期升1.1%，剔除能源和食品後的核心CPI較上月升0.2%，按年則升2.1%；而4月新屋開工數量達到年化117.2萬套的水準，高於預期；而4月工業生產增長0.7%，亦好預期的增長0.2%。 

聯儲局官員近期頻頻出口術，話聯儲局加息合理，似乎在做佢非常善長的期望管理工作，目的係叫大家唔好以為見到4月非農就業數據好差，就以為今年最多只會在年底加一次息，甚至唔加息。 

美股上週五企穩，標普500指數升0.6%至2052點，全個星期微漲0.3%，結束此前連續三周的下跌。標普500指數十大行業板塊中漲，能源板塊表現最好，上周漲1.5%，年內累計漲幅為9.8%，公用事業板塊表現最差，上周跌2.4%，但以全年計表現係一哥，累積升幅10.9%；年內最差的是金融股，累計下跌2.9%。公用股強顯示今年美股係一個弱市。 

今年美股可以講係原地踏步，至威就係商品市場啦。雖然由5月初開始回落了超過4%，但年內仍有連18%進賬，遠跑贏股市。其他貴金屬的成績亦不弱，銀升了12.8%，白金（Platinum）亦有14.4%進賬。商品強和美元弱好有關係。 

金價之所以造得咁好，係美元弱加全球利率不升所致。美元今年至5月以來走弱，反映美元兌6隻主要貨幣匯價的美元指數由去年底的98.63一路跌至5月初的92.63，大跌6.1%，最近的三個星期持續反彈，回升2.9%至上週五的95.33，金價呢段時間亦由高位每安士1306美元，回落至上週五的1252美元。 

對於金市後市，市場普遍仍然樂觀，摩根大通認為，黃金預計今年會升到每安士1400美元，與現價比，仍有約12%的上升空間。 

摩根大通私人銀行的 Solita Marcelli 解釋，由於全球央行正在不斷推印錢紙，甚至推行負利率政策，黃金將會成為替代貨幣。當美國國債及債券息率已經跌至歷史新低，在央行預期甚至出現負利率的前提下，債券價格會再跌，佢已經唔再係無風險資產，為了要分散投資及儲備的風險，央行會買入保值能力較高的黃金。黃金雖然無息收，甚至有儲存成本，在債券跌價的前題下，?黃金仍然有著數。另外，大戶亦會買入黃金來對沖現時比較波動的市場。 

CNBC特約財經撰稿人Dennis Gartman對金市睇得更牛，佢認為黃金牛市已經出現，只要全世界重要的中央銀行都維持目前的寬松貨幣政策，黃金的上漲是不可避免的。不過，佢又提醒投資者，由於市場對聯儲局加息的預期升溫，利息上升，持金成本會上升，又因為黃金以美元計價，美元上漲，對金價會做成壓力。市場目前預期聯儲局今年會加兩至三次息，所以暫時應該唔好買金，即使要買，也要買以日元或者歐元計價的黃金。 

無論如何，睇黃金長線長漲，即係睇淡美元和美息前景，估計美元反彈一輪之後，又會回軟。