金手指 - 孫柏文 2016年7月5日
■英鎊落筆呢刻超超超值。 資料圖片
上個禮拜，白銀、英鎊、人幣都非常大波動。英鎊跌到飛起，白銀升到甩轆，而人幣就多年新低。
先講人幣。如你係個「聰明」人，機關算盡，呢五年來將自己香港層樓按咗，諗住H+1%去借錢，跟住攞番大陸做定期，每年賺幾個百分點嘅息差兼人幣
升值，咁要恭喜你，因你學到咩叫「屙凸」。喺大陸嘅錢，紙上幾富貴都好，攞唔返出來，都係死。而大陸銀行系統一日未能畀人感覺清曬壞賬，人幣續跌，滴水式酷刑。
英鎊，落筆呢刻超超超值。英鎊最不明朗因素就係歐盟會開咩脫歐條件。之前歐盟講到要「殺一儆百」兼要歐盟各國繼續行統一路線，點知到今日傳來德國總理不但唔想懲罰英國（會兩敗俱傷），佢哋覺得歐盟再中央集權，會令歐盟散。所以傳來要換鷹派嘅歐盟主席Juncker。如歐盟鷹派末落，英國冇事，英鎊將大反彈。特別係對我早幾個禮拜唱淡，樓市就爆嘅加幣。今日每英鎊兌1.71加幣，應好快二對一。
好多人問點解白銀升咁多，連黃金都拋離。首先，比2011年高位，如銀跌幅同金一樣，白銀應賣30蚊美金。落筆呢刻只係廿皮。再講，全球人民正醒覺，衝擊現有秩序，而最後碉堡必定係央行。啲央行行長們，喺印鈔聲下聽唔到人民坦克衝來嘅聲，會有排升。不過如你用孖展買白銀，現水平要諗平倉。
白銀每盎斯20蚊（美元·下同）唔係特別貴，亦唔係特別平，但喺呢個水位無端端好友、淡友駁火，長短倉雙雙破歷史高位，背後牽涉200億對決，有乜嘢大事正在醞釀等待爆發？
5月時曾提及，據美國商品期貨交易委員會（CFTC）數據，白銀嘅倉位，商業性同非商業性投機者嘅淨長倉及淨短倉都創歷史新高。截至6月28日，兩邊倉位冇減不特止重要加倉，咁樣對峙法就係要將對家吞落肚先會收手。
商
業性持倉主要係業內人士，非商業性持倉主要係對沖基金等投機者，過去兩邊對決，最後通常業內盤贏，所以當時估計白銀要爆落，結果大錯。大盤口對決而投機者
贏，次數唔多，但贏親都係有大鑊嘢。例如2008年嘅油價，石油開採商當時心諗：「阿叔挖油多過你食飯，挖幾多，賣幾多，心中有數。」所以唔少油商同大行
對賭，將預期產油量打包以溢價賣出，收錢袋袋平安。點知最後油價夾到140蚊打爆倉，油商中招嘔突。
有關白銀走勢，嘗試從三個角度睇。首先，從技術走勢而言，銀價破大頸線上，第一浸最少見23至24蚊，到位後估計會輕輕突破，再略回，會否爆第二浸要再視屆時倉位。
其次，銀價已出現100天線升穿500天線嘅黃金交叉，21世紀只出現過2次，今次為第3次。當出現呢種長線黃金交叉，升幅往往超過50%，而銀價由今年低位至今升幅亦已超過50%。
其
三，黃金白銀比率長期徘徊於40至80，中位數60，意思係每盎斯黃金可換60盎斯白銀。我哋現時嘅貨幣系統，以布雷頓森林體系瓦解為分水嶺，所以由
1975年起計，黃金白銀比率最高100.82，最低14.01，執筆時68。若比率要回至中位60，一係金唔升銀升，一係銀唔升金跌，或金少升銀大升、
金大跌銀少跌。
由於從幾個角度睇銀價已接近第一浸短頂，現時才追風險唔細，寧願由佢升到23至24蚊睇下會否回塘，再睇下倉位仍然對峙定已陸續平倉，先再睇位決定較穩陣。
Mr. Tregunter
http://hk.apple.nextmedia.com
