果籃指數新低 2012等收皮

睇完係心到笑左出來....哈哈

 大家出年 小心 小心
每年聖誕節前半個月，《蘋果》財經版會陸續收到一籃籃由上市公司、券行輪商以及地產代理送來的 Christmas果籃，少則十數個，多則二、三十個，但今年果籃行情竟然同股市成交一樣：「萎縮乾塘」。昔日同事果籃食唔晒的情況，變成今年蝗蟲爭食的 現象，有見及此，股榮深感事態嚴重，有必要探討背後有何玄機？
截至上周四，非官方統計，聖誕果籃數目竟跌至單位數，根據資深員工阿珠透露，情況仲 衰過 08年金融海嘯時。那些年，果籃上曾見到北海道蜜瓜、和歌山蜜柑、青森蘋果等蹤影，今年竟變咗大西柚及藍莓、貴價朱古力換成蝴蝶酥餅乾，葡萄酒取代紅酒， 但最離譜的，為咗撐滿個籃，竟然出動埋公仔，仲要打孖兩個，唔講仲以為係情人節果籃。
果籃數目事少，背後所帶出的意義重大。不怕潑大家冷水，一個果籃，盛惠數百至數千元，若非企業極度悲觀，點都會送番個做吓人情。今年零售市道並不算差，明年多間企業更言之鑿鑿會加薪，但我更相信眼前的事實，由果籃數目，對預示明年經濟前景更有啟示性。

企業看淡經濟先節流

08年金融海嘯後，各國政府瞬即採取救市措施，大開水喉，大部份公司亦積極加強宣傳，憧憬出年（ 09年）強勢復蘇，因此企業不敢造次，大 cut budget，當年聖誕收到果籃數目，絕對遠較今年高， 09年恒生指數亦在各國放水下狂飆 52%。及至去年下半年，內地通脹高企，美國經濟復蘇緩慢要推出第二輪量化寬鬆措施（ QE2），企業信心明顯下滑，果籃亦開始縮水，或者正正預示今年大市下跌兩成因素。
企業減送果籃，最大原因是未雨綢繆，先行節流。企業對明年生意情況、定單數量，現時起碼有七、八成掌握，知道明年經濟「堅」淡，送禮等不必要開支，可慳則慳，留番經濟轉好時始出動銀彈，亦算是負責任企業的表現。
香港經濟表面繁華，高端消費排隊人龍仍然絡繹不絕，人人揸住 iPhone仍然未知驚，但股市近期陰乾式下跌、樓市半死不生，支撐香港經濟命脈的兩大支柱已搖搖欲墜。筆者並非要在此危言聳聽，但事實擺在眼前，今年仍有果籃收，我驚出年要收皮。 

http://hk.apple.nextmedia.com