周大福金條 近全線斷貨

 http://news.mingpao.com/20111220/ek1a1.htm

 

金價回落 自由行客勁掃

 

近排金價跌番唔少，搞到小琴心郁郁想買番啲金儲下，第時嫁得出的話，可以用來做嫁妝。早兩日行過周大福（1929）的金舖，諗住入去買番d金條、金粒咁啦，點知店員姐姐竟然話賣晒，小琴當堂打左個突。

話就話金價跌，都唔係無貨賣咁誇呀。店員姐姐同小琴講，好多自由行客湧來掃清光。梗係啦，要投資的話，買飾金要蝕手工費，點計都係買金條金粒抵d。

個別分店 10月已斷貨

佢就話，因為要等總公司派貨，有幾多貨量都係今日唔知聽日事。就算入左貨亦唔一定有，皆因自由行一早就來掃走。聽聽下，覺得唔多忿氣，一於打去其他分店問下。問齊全港九咁滯，都話無晒貨，金條、金粒全線斷貨咁話。

周大福：日日有補貨

有分行仲同小琴講，話10月開始已經斷貨，申請左個幾兩個月都無貨返。好多客成日打來問，但係宜家無貨賣，唯有買住飾金。老實講，飾金點靚都好，一定唔及金條金粒咁紮實，畀到人安全感。

周大福品牌總監陳義邦同小琴講，話臨近年尾，加上新年快到，呢排佢地舖頭都多左自由行客，趁過年前入貨送禮自用，生意好左好多咁話。佢仲話，公司的庫存無問題，唔怕無貨賣，仲日日有補貨添。不過，小琴真係問極都冇，唔通真係要買番兩手周大福，就當自己買左？