樓市升唔停，大中細地產代理係咁加分行加人，仲要出埋「過檔費」、「介紹費」、「加盟費」貼錢搶人，睇嚟所有地產代理今期都要搞人海舖海戰術，成個勢仲勁過97年樓市高峰期。
介紹費有一皮嘢
大行之一美聯物業出手最豪，同業「過檔費」高達9000蚊，呢9000蚊點計呢？美聯執行董事兼集團住宅部行政總裁陳坤興話絕無取巧，首先，新人加盟美聯已經有2000蚊加盟費，如果係有牌嘅行家仲正，做滿6個月同9個月，又達到指定業績，分別再醒多4000及5000蚊，加埋就有9000蚊。
除咗有過檔費之外，美聯員工如果介紹有牌嘅經紀加盟，亦有一皮嘢「介紹費」，都咪話唔吸引。
香港置業亦搶人，港置高級執行董事伍創業話，即日起至10月底，員工每介紹一名新人加盟，最多有一皮獎金，介紹次數仲係無上限。新人都重金咁搶，真係好等人用。
大型同中型行係咁挖角，細行點生存？代理全港十八區中小型代理行嘅香港專業地產顧問商會會長鄺志輝鬧爆，指各大代理行最近要搞人海舖海戰術，周圍挖角，帶來惡性競爭，亦搞到行業質素下降，佢哋無計，都要被迫跟住搶。
大行用介紹費搶人，佢哋唔單止畀3000蚊做介紹費，仲有新人頭三個月總生意額嘅3.5％傭金作為額外獎金。簡單嚟講，都係鬥搶！狼振英睇見咁嘅情況，仲唔做嘢，個市只會越煲越旺，市民置業難上加難。
各行搶人招數
美聯
【招式】現職行家過檔最多9000元；加盟獎金最多5000元；開單獎金最多8000元；轉介獎金最多2000元
香港置業
【招式】員工每介紹一名新人加盟，獎金高達一萬元，介紹次數亦「冇上限」；新人另有最多5000元獎金
香港專業地產顧問商會
【招式】新人介紹獎金3000元，同時可獲該新人首三個月傭金的3.5%作為額外獎賞
沒有留言:
發佈留言