Money Walker： 十年利率幾番負？

 
■日本央行已經先行一步，推出負利率。　資料圖片 

十年人事幾番新，連「負利率」都早已唔係大家以前認識嗰回事。 

十年前已有「負利率」呢個概念，不過同今時今日嘅「負利率」有啲出入。當年講緊嘅「負利率」，係指通脹幅度高於銀行所提

供嘅存款利率，結果令到放喺銀行嘅存款，實質購買力遭到削弱。 

事隔十年，「負利率」又成hot topic，今次講緊嘅「負利率」係另一樣嘢，意指你擺錢落銀行唔止冇息收，仲要畀番費用銀行，多謝佢幫你keep住啲錢，等你唔使怕放喺屋企會俾人偷。 

香港息口跟住美國走，美國𠵱家仲有0.25厘至0.5厘息，所以香港小存戶頂多都只係身處於零息時代，仲未步入負利率世代。不過歐日市場已經行先一步「負利率」，當地銀行暫未向小存戶收取存款費用，但大家都知呢一日唔遠，亦冇人預計情況幾時會殺到入香港。 

話說十年前筆者俾個保險經紀sell一份儲蓄保單，話預計30年後供落舊錢可以翻到六倍。當年曾有一下心動想買，直到多年後，發覺港島區細價樓30年間樓價翻咗16倍，先明白翻六倍一啲都唔算多。不過筆者並冇覺得十分慶幸，因為當年其實係選擇咗另一份保單，呢份單話保證供滿指定年期後會有幾十萬畀番我。呢一刻筆者要考慮嘅已經唔係呢幾十萬保證回報算唔算太少，而係要擔心喺負利率時代，大量債券孳息跌至負水平之下，保險公司究竟靠投資乜嘢嘔到個保證回報出嚟。